2 anti illegal drug na Police, nahuling nangongotong

MANILA, Philippines - Huli sa entrapment operation na aktong pangongotong ang dalawang pulis sa  loob mismo ng opisina ng Caloocan City Police Station Anti-Illegal Drugs Unit, kamakalawa ng hapon. 

Ayon sa ulat ng pulisya, unang nagtungo si  Laila Catamora, 27, sa PNP-Criminal Investigation and Detection Group sa Camp Crame upang isumbong ang panghihngi umano ng  P100,000 ng mga tauhan ng Caloocan SAID-SOTG upang mapalaya nag kanyang live in partner na si Linso Amogis, 26-anyos.

Ang dalawang suspek ay kinilalang sina PO2 Christian Geronimo at PO2 Kris-toffer San Juan, kapwa nakatalaga sa Caloocan SAID-SOTG.

Nakipagkoordinasyon naman ang CIDG kay NPD Director Fajardo  at ikinasa ang entrapment operation na nagresulta sa pagkakaaresto kina Geronimo at San Juan sa loob ng opisina ng SAID-SOTG sa Caloocan City Police compound.

Dinisarmahan ni Fajardo ang dalawang pulis at tinanggalan ito ng tsapa at ipinagutos kay  Caloocan City Police chief, Sr. Supt. Johnson Al­mazan na linisin ang buong hanay ng SAID-SOTG.

Patuloy ang paglilinis sa hanay ng pulisya ayon kay Fajardo. Hindi rin umano nila kukunsintihin ang mga illegal na ginagawa ng mga pulis